ليل حلمي الغريب...

ليل حلمي الغريب!!!

انا:يوووووووووه....انت جيت تاني ياعم الليل....مش انت لسه جاي امبارح ؟هو كل يوم؟

الليل:ايه ياعم مالك...مخنوق مني ليه...دنا كلي مميزات!!

انا:ههههههههه...مميزات؟طب ارغي ياعم الامور وقول ايه مميزاتك؟

الليل:كتير اوي...اقلها انك مفروض تتخمد وتنام فيه بدل منت بتسهر لوش الفجر....وقالبني نهار وقالب نهارك عليا

انا:ايه ياعم عمرو...متغني احسن ...قول ميزه تانيه..

الليل:وماله ...انا كلي رومانسيه...هدوء ...سكون...حيره...سهد...دنا كفايه عليا اوي ان الست غنتالي

انا:اه ...طيب اللي مش رومانسي ياعم الحج؟يعمل ايه بقي في ليلتك دي؟

الليل:عندي فكره تانيه....قوم بص كده للسما...شوف النجوم و القمر..خد نفس عميق اوي هتحس براحه نفسيه جامده موز

انا:ههههههههههه....ومنين هتيجي الراحه دي؟......انت شكلك بتحب ياعم!

الليل:في ايه ياعم...مش قادر افهمك...عايز ايه؟

انا:بقولك ايه ياعمونا...من غير زق...مش طالبه غباء

الليل:طيب جربت تحلم في عزي؟

انا:ههههههههههههه...طيب منا اتربي في عزو احسن...امال هو مخلفني ليه؟

الليل:افهم ياض...انت جربت تحلم بالليل قبل كده

انا:صباحه غباء..واحلم بيك ليه اساسا؟

الليل:انت ذكي كده ليه...انت ليك احلام في بالك ولاحاجه...ونفسك تتحق؟فضفضلي واتكلم معايا

انا:اااااااااااااااه ياليل...ااااااااااه ياعين....دنا احلام كتير اوي اوي اوي...بس انا متفائل بيك وحاسس انها مش هتتحقق

الليل:طيب اهدي كده...نبدأ من اول السلمه...ونخلي بالنا من السلمه المكسوره وناخدها حلم حلم...وادينا بندردش بدل منا فالح طول الليل تشيت مع البني ادمات علي راي الواد علام

انا:وماله ياعم...دي حتي قعده الراجل بمليون بنت

الليل:طيب وان جات البنت....؟

انا:تروح تنام عشان النهار هيكبس عليك.....

الليل:طيب هعديها....اول حلم في حياتك؟

انا:اول حلم اني اخلص من الكليه دي علي خير واخلص جيشي عشان اتنيل بقي اكمل نص ديني

الليل:طيب دي سهله...وايه تاني؟

انا:اهدي بس علي نفسك كده...طيب كليه وجيش هيخلصو...هتجوز منين؟

الليل:بمرتبك اللي هتاخده...

انا:ههههههههههه...دنت طيب اوي ياجدع...!!!مرتب مين بس...ده يدوب الواحد يجيب بيه جيل لشعره...او موسين حلاقه يحلق بيهم دقنه...الموضوع كبير اوي ياليل....بس انا عندي فكره جامده

الليل:ايه هيا؟

انا:بفكر ابدأ حياتي اتاجرلي كده في كام سطر افيون ,,,كام تربه حشيش علي كامه باكتة بانجو...,بعدين اتغني واتوب بعدها بقي...

الليل:فكره كويسه...بس هتغضب ربنا وتبني حياتك علي حرام في حرام!!!

انا:طيب قولي اعمل ايه بس...دي السكه الوحيده اللي تطلعني فوق ...بدل منا هتخرج مش لاقي اكل...وكما عايز احقق حلم ال 5 ع...

الليل:مش تيأس من رحمه ربنا...ده ربنا بيرزق النمله في جحرها ياجدع!!!

انا:كله علي الله ياعم....اه عندي حلم كمان....

الليل:خير؟؟

انا:عايز اهاجر لبلد اجنبي ...امريكا مثلا...النمسا...الحاجات الجامده دي...واتجوز واحده جامده هناك تزبطني

الليل:وتسيب بلدك...!!!اللي انت اتولدت فيها...اتربيت في خيرها...شربت من نيلها علي راي شرين اه ياليل..!!

انا:بلدي علي عيني وعلي راسي....تراب بلدي وسام افتخر بيه....بس ايديها تقيله اوي علينا...

الليل:ازاي؟

انا:بلدي مش مدياني حقي ...بلاش حقي المادي ...حقي الاجتماعي كانسان...كرامتي....مكانتي كدكتور المستقبل...مش لاقي نفسي فيها

الليل:يعني كرامتك دي هتلاقيها بره بلدك؟

انا:للاسف الانسان المصري الفرعوني متهان بره وجوه بلده.....بس هناك هلاقي بدل كرامه...صحيح مش هحس اني بني ادم اوي..بس بردو احسن من مفيش...

الليل:ويعني انت فاكر انهم به مستنين مجدي يعقوب يعني؟ياعم انت فين من مستوي الناس اللي هناك دول؟

انا:مش مشكله...ومش مهم اشتغل في الطب...المهم اني اعيش عيشه مستريحه....ان شاء الله اغسل اطباق وحلل

الليل:طيب متعمل كده في بلدك...ولاهو انت يهمك المظهر الاجتماعي؟يعني اللي بتعمله بره تتكسف تعمله جوا بلدك؟

انا:اه بقي ياعم الليل..ومش انا لوحدي كل الشباب كده....طبيعتنا كده علي رأي عاشق فؤش..(تمثال ملامح فاضي من جواه,,,مجروح وبصرخ بس من غير صوت)

الليل:اه عندك حق...بس نصيحه مني....متفكرش كتير ...وبلاش تحلم احلام بالجمله كده...احلم قطاعي..وحاول تحقق كل حلم منفرد ....هترتاح كتير بدل منت واجع دماغي كده

انا:اكيد...وربنا اكيد هييسر الحال...انت مش هتنام ولاايه؟

الليل:لاء انا قاعد معاك شويه

انا:عندي حلم كمان؟

الليل:قول...منت احلامك تجيب الضغط...

انا:نفسي اتجوز بنت جميله اوي...عيونها زرقا...وتتحمل كل مصاريف الجواز

الليل:ازاي؟

انا:يعني علي رأي شعبوله(عليها العفش كله...وعليا انا الازاز)

الليل:اطمن مش هتلاقيها

انا:منا عارف...بس انت ليل حلمي الغريب...صعب اقولك حاجه معقوله

الليل:طيب انت مش ليك احلام رومانسيه؟

انا:انت رايق اوي ياجدع...الرومانسيه هتيجي منين في عز البلاوي اللي الواحد فيها دي؟...الرومانسيه دي هلاقيها قين بقي ؟

الليل:دنت غم اوي ياجدع....بقولك ايه.....

انا:قول

الليل:انا هسيبك ياعم....هروح اشيت مع كام نجمه كده من اللي فاتحين عندي دول

انا:بتبعني ياليل...!ونا اللي عمال اقولك قعده الراجل بميت ست!مكنش العشم...!!

الليل:معلش بقي ...نكمل وقت تاني...بس تحلم احلام معقوله وعلي قدك

انا:للدرجه دي ياليل...انا احلامي كلها مشروعه وكل بني ادم بيحلم بيها...ولاايه؟

الليل:اه صح...معلش بقي هستأزن عشان البت نجمه بترن عليا..وممكن تقفل لو مش روحتلها

انا:وماله ياعم...الله يسهلك ويحبب فيك نجومه....بس ابقي تعالي تاني

الليل:انا كل يوم موجود...بس انت اللي مش بتبقي فاضيلي...مش بتعوزني غير لما يكون ليك مصلحه!!

انا:ماشي ياعم...هستناك

الليل:ماشي...يلا بقي استغطي كويس واشرب حاجه دافيه واحلم علي قدك

انا:ماشي ياعم....مش هحلم خالص عشان خاطرك

الليل:يلا تصبح علي خير

انا:تصبح علي نهار ياسيدي

...................................................................

Dreams like anesthesia....just recovery occur....every thing is lost&post dream pain presist.......so,make all ur life dreams....till proved otherwise

ALADL_TAHA PRODUCTION

D&T.........................NOT DVT